Reportaxe fotográfica
Cando se está facendo unha Pantalla é fundamental axustar a máscara á persoa que a vai poñer. Temos que pensar que unha Pantalla é unha máscara moi dinámica: corre, salta, anícase, sufaldrea, baila, colle as persoas para metelas nas tascas…
A verdade é que unha Pantalla non para un intre na rúa. Ter a seguridade de facer todo isto sen que a máscara se mova, fala moi ben do artesán no que confiamos a elaboración da máscara.
Nesta reportaxe conto cuns amigos que levan anos facendo Pantallas e saben o que se traen entre mans.
O Gude e O Poly cando mozos estiveron man con man con Julio Villarino aprendendo os segredos de como se debe facer unha Pantalla. Tamén axudou O Pipo que fai Pantallas e que vive o mundo da máscara con paixón.
Foi un intre moi especial ver e escoitar como facían as medicións de axuste da cara e do corno. Este método é o tracidiconal e témolo visto nalgunhas máscaras antigas. Estas Pantallas vellas co paso do tempo foron perdendo a pintura e puidemos ver o papel de periódico coas marcas.
Unha vez marcado un lado da máscara, fanse as mesmas marcas do outro lado. O seguinte paso é coser cara e corno tomando como referencia as marcas laterais e a marca central.